ראשי > תנ''ך > תהלים >


תהלים סא

1 למנצח על-נגינת לדוד.
2 שמעה אלהים רנתי הקשיבה תפלתי.
3 מקצה הארץ אליך אקרא בעטף לבי בצור-ירום ממני תנחני.
4 כי-היית מחסה לי מגדל-עז מפני אויב.
5 אגורה באהלך עולמים אחסה בסתר כנפיך סלה.
6 כי-אתה אלהים שמעת לנדרי נתת ירשת יראי שמך.
7 ימים על-ימי-מלך תוסיף שנותיו כמו-דר ודר.
8 ישב עולם לפני אלהים חסד ואמת מן ינצרהו.
9 כן אזמרה שמך לעד לשלמי נדרי יום יום.

ראשי > תנ''ך > תהלים >


תוספות ותגובות